Bachpan mein na, main kathakaar thi.
Bohot gazab ki.

Kahaniyaan bana leti thi hawa se, dhool se, khidki ke baahar udte patton se.
Aur phir sabko sunaati thi — maa ko, papa ko, neighbour ki aunty ko, school ki bench par baithi thaki hui classmate ko…
Chahe koi sunna chahen ya naa chahen — meri kahani sabko sunni hi padti thi. 😄

Par fir life happened.
Aur kahaaniyon ke panne kuch file folders ke neeche dab gaye.

Ab, main ek journalist hoon. Pichle 10 saal se sirf ek kaam kar rahi hun — “chasing deadlines for the headlines”.

Par kahaaniyo waala dil ab bhi kahin zinda hai. Thoda sust, par dhadak raha hai. Iss blog ke zariye, main uss dil ko thoda sa waqt dena chahti hoon.

Kabhi kabhi lagta hai… pehla blog post likhna kisi diary ka pehla panna kholne jaisa hota hai. Thoda sa jadoo. Thoda sa darr. Aur bahut saari chai.

Sach kahun toh, yeh blog planned nahi tha. Yeh ek feeling thi — jo kab se dil ke kone mein baithe, ungli pakad ke kehti thi, “Chalo, kahani likhte hain. Apni waali.”

Yahan na koi headline hai, na deadline.
Yahan lafz thoda late aate hain — par jab aate hain, dil se baatein karte hain. Sentences fursat mein tehelte hain, aur commas thoda ruk kar sochne ki mauhlat dete hain.

Yahan main likhungi woh jo likhne ka waqt kabhi mila hi nahi — sapne, unsuni baatein, aur woh dhun jo bachpan mein mere kaan mein bajti thi — jab duniya bahut khubsurat thi, aur kal thoda door.

Kuch aise kisse jo dil ne soch liye the, par zabaan tak kabhi aaye nahi. Yahan kuch aise log milenge jo kabhi the hi nahi — par fir bhi kahin reh gaye.

It’s not a big thing. Yeh ek chhoti si jagah hai — jahan lafz nange pair ghoomte hain.
Jahan “What if?” sochne ki ijazat hai… Aur kabhi kabhi, “What now?”

Agar aap yahan tak aa gaye ho — toh shayad yeh kahani ab aapki bhi hai.

Toh aaiye, chai thandi ho rahi hai… aur kahani bas shuru hone hi wali hai.